غصة قصيرة جداً
علاء سعدون

• عمو أني جوعان !

• وين بيتكم عمو ؟

• عمو أحنه ما عدنه بيت !

• ليش ما عدكم بيت وين كاعدين لعد ؟

• عمو جان عدنه بيت جبير كلش بس باكوه!

• منو باكه؟

• امي تسميهم (الملاليج)..

• و منو هذوله ؟

• مره يطلعون بالتلفزيون، ومره يوزعون بطانيات، ويكولون راح نسوي المجاري ونبلط الشوارع، عمو بس همه ما يدرون وناسين أهم شي ... يا مجاري ويا شوارع وأحنه بيت ما عدنه!

• حبيبي امشي وياي دليني وين كاعدين ؟

• عمو ادليك بس مو تكل لمي اني كتلك ما عدنه بيت تره ما تقبل ..

• وليش ما تقبل ؟

• أمي دوم تكول احنه بخير وعايشين وبيتنه العراق بكبره.. بس هسه هيه مريضه وما تكدر بعد تخبز للناس وتنظف بيوتهم حته ينطوهه خبز وهدوم.

• عمو انته شنو تتمنه؟ يعني اكبر حلم الك شنو؟

• أمي تكوم من مرضهه وترجع تخبز للناس حته ناكل لكمه وتجيبلي هدوم للعيد راح يجي..

• وامك شنو حلمهه حبيبي ؟

• أمي ... امي تتمنه تشوفني جاي من المدرسة والمعلمة كاتبتلي(احسنت يا بطل).

 

(هي غصة في القلب وليس قصة)

الموضوع السابق مونولوج شخصي

قناتنا على التلغرام : https://t.me/kitabat