أدركنه يا علي
حامد گعيد الجبوري

لسمك يا علي رب الجلاله أختار
وجمع أحروف أسمك ترتفع قمه
حرف العين عادل ما يميلك راي
وعدوك ما يخافك ظنته أتظلمه
وحرف اللام لين مو سبُع ع الناس
خيمه ع الرعيه وبيك ملتمه
وياءك يا علي ينبوع للأحكام
خطيت أبكتبها منهج الحكمه
علي ثاية فخر تتوسط التاريخ
وتاريخك شرف محد وصل يمه
ما حسبك إمام أمن العرش معصوم
أنت أبسر وجودك تنتج العصمه
                                           ***
الكعبه شالته وبت الأسد حملت
وطلكن فرد طلكه ومن علي الهمه
صاحن يا علي بسم العلي أتنخاك
وسهلها الولادة أبنطقة الكلمه
لسان النبي يرضع والنبي أمربيه
ومحمد ربّه خصه الكل فضل نسمه
للكعبه جذرها وللركن ثبّت
وزمزم بيها طيب ومن علي أتشمه
أبو الكعبه علي ولا أيهمك اليغتاض
وبعد اكثر نغيضه الحيدره أمه
كبل جبريل حيدر يحفظ القرآن
مثل آدم أبكلشي خالقه أمعلمه
علي اليعرج سماء الله في كل حين
قرأنه الوسيلة وما تعب جدمه
صعد جتف النبي وتتصاغر الأملاك
وتركعله أبخشوع وتسجد العلمه
بيه خصله علي يضرب قسمها أثنين
يشطرها عدل ما بينهن وهمه
جنين أبطن أمه وشطر بيت الله
كرامة الحيدره طابوكها أتهدمه
أمحير للبشر حيدر علي الكرار
شي رب عبدته وشي كافر أتذمه
علي اليخذف يخاف ويرعد أمن الله
وصناديد الزلم تخذف من ذكر أسمه
يكبر للحرب تتراجف الصوبين
ويرجف من فقير ويكرمه اللكمه
علي الأنزع بطين وربعه من ينقاس
وأفعاله جبل والمابصر أعمه
خبز أشعير أكله وقوته جف الله
وباب الحصن خيبر يسرته أتزمه
يمينه ذو الفقار ويسره درعه الباب
ويحسم للنزال وضربته الحسمه
لا فر من حرب لا يتبع اللي فار
واليثبت السيفه عورته أتسلمه
جبريل العلي كبر لا فتى إياه
ولا سيف الفقار الغيرك أتسمه
                                           ***
أبحق حيدر علي آيات بالقرآن
البراءه الواقعه التطهير وبعمه
كفو الزهراء والزهره كفء حيدر
ومواريث النبوة تنجب اليمه
أمير المؤمنين وباك حب الناس
وسراط الله علي بولايته القسمه
بيت المال بيده ولا ملك للبيت
وجديد الفقره لبس مو سمل هدمه
ردتله الشمس كل شيعته أيزعمون
وآنه أول موالي أيخالفه أبزعمه
ما ردها علي أبنور العلي ردت
سطع نوره وعلاها وصارت أبعتمه
ومن سمعت أذانه فزت أمن النوم
ما أدت فرضها أبوكته متوهمه
توضت بالفرات وبالخجل رجعت
صلت مو  قضاء وخلفه مأتمه
                                         ***

علي أول خساره الكل فقير أيعيش
وعلي أول ربح والحاقد أيظمه
علي المظلوم الأول عزه للمظلوم
حيدر منظلم ظلموها للأمه
أبجريرة حيدره تهموا أبوه كافر
وأبو طالب رسالي ومؤمن العظمه
علي وجعفر عقيل وطالب أيحرسون
وأبو طالب كفيله ومو فقط عمه
ولو نفرض جدل حيدر أبن سفيان
نسبوله النبوه وزعمَه يحترمه
يسبوه ع المنابر رادوا أيدثروه
وتكابر بالشموخ ويعله بالشتمه
علي طلك الدنيه الرادته أيبسم
طلكها أبثلاثه وفوكهن بسمه
علي خادم شره يكضيله شغل البيت
صبح سيد الخادم حيدر أيخدمه
صريفه ما ملكها ولا ترك دينار
وذهب كبته ضياء أينوّر النجمه
أبو الكل اليتامى وللأرامل بيت
اليتامه من رحل حس أبعظم يتمه
علي ذكرك عباده وعترتك تسبيح
وفخرك من محمد كاشف الغمه
شسع نعلك علي شرّف كراسي وتوج
وعبّاد الكراسي أتاجر أبدمه
                                       ***
رافضها الزعامه وبايعوه مجبور
خليفه والخلافه لا ذت أبحلمه
لا نثريه يصرف بالشهر مليار
يمنحها اليحبه اليكرها أيحرمه
لا صحوات عنده  ولا فرق أسناد
ولا يرشي الشيوخ أبحملته أتلزمه
يوميه طبك يوميه طف وموت
يوميه لطم ودمانه متهمه
مشو فوك الجثث وأجتافي معبر صار
وصح بينه المثل من رجلك الحمه
ما همهم شعب كل همهم الدولار
متحزم حرام أيجمعه ويلمه
هدموا للوطن يبنون للأحزاب
وذبحوا للشعب بسيوف منسمه
علي عندك حزب يمتص دماء الناس
وعلى أكنوز السياسي الفقره تتحمه
يا بويه علي هم يطلع الدجال
مو هذا الدجل من بيرغه وعلمَه
هدر فرعون من دم الشعب آلاف
وفرعون الجديد أبلكمته أيعدمه
أخذوها عبر من تجربة صدام
يطيّحكم الطيح دولته وصنمه
لحايه من جذب وإيد المحابس زور
ويسولفلي أبعلي وبسيرته وحكمه
يا بويه علي ما ظامك اللي صار
ولا هزك فقير المافتح فمَه
علي بويه علي طحنه أبحلك تجار
أرخص حاجه عنده بيعة الذمه
أدركنه يا علي الخاطر يتيم الضاع
ليالينه أبسواد أنهارنه الظلمه

الموضوع السابق حُمى القمر

قناتنا على التلغرام : https://t.me/kitabat