مقترحاتي للبنك المركزي العراقي
انس مرشد

 
1-البنك المركزي لازم يلكة طريقة يسحب بيها الدينار من السوك و يرجعة للخزينة و للمصارف و البنوك حتى يوفر سيولة ينطي بيها رواتب للموظفين .
2-البنك المركزي لازم يلكة طريقة ميخلي الدولار يطلع خارج العراق ويحاول يجيب هواية دولار ويترس بي السوك العراقي و الخزينة حتى ينزل سعر الدولار كدام الدينار .
3- شلون ؟؟ أقروا المنشور .

البنك المركزي كانت نيته من اصدار الــ50 ألف دينار أن يسهل عملية النقل و الفرز و الحسابات بحيث
المواطن بدل ميشيل كميات هواية يشيل 50 ألأف دينار أذا جان الهدف هو تنظيمي وليس تحسين للعملة !

العملة تحسن بطريقة واحدة فقط هي القضاء على التضخم وشلون نقضي على التضخم ؟

البنك المركزي يواجه مشكلة وهي وجود نقد متداول بالسوك هواية والفلوس مدترجع للبنك لأن المواطن ميجي يودع بالبنوك والمصارف فلوس واذا ما ودع راح متكدر الحكومة تنطي فلوس ورواتب للموظفين فراح تضطر تطبع فلوس واذا طبعت فلوس راح يزداد النقد المتداول وراح يزيد التضخم  !

أبتكر البنك المركزي مزاد الدولار حتى يبيع دولار وياخذ بمكانة عراقي حتى يكدر يسحب الفلوس من السوك و ينطي رواتب !

أني راح انطي حل للبنك هم يسهل عملية حمل النقود للمواطن وهم يقضي على التضخم وهم يجيب فلوس للحكومة شلون ؟

يصدر البنك المركزي فيزا كارد و كريدت كارد راح يجي المواطن يودع فلوس بالبنك حتى يحصلها بحيث يكدر يشيل مبالغ عملاقة بكارد بجيبة وبنفس الوكت الحكومة حصلت وسحبت نقد من السوق .

الحل الثاني انه تسوي دين عام وتبيع سندات للمواطن وبفوائد جميلة ومناسبة للمواطن وراح تكدر تجمع فلوس من السوك

الحل الثالث أنه تسوي أدخار اجباري للموظفين الرواتبهم كلش عالية وزراء ومجلس نواب الخ بحيث تاخذ 10% من الراتب وتودعة بالمصرف وهنا راح توفر نقد وسيولة بالمصرف !
تثقيف المواطن على الادخار البنكي واني يضم فلوسة بالبنك بعد متوفر الة الامان

الحل الرابع ترفع الاحتياطي القانوني الخاص بالمصارف بحيث يجي يودع المصرف الاهلي فلوس زيادة بالبنك المركزي العراقي وهذا راح يخلي البنك الاهلي او المصرف الاهلي يكون حذر بعملية الاقراض.

يجب ان يهتم البنك المركزي بالتسويق و يحاول يثقف المواطن العراقي ويخلي يقنع و يكون عندة ثقة بالبنك ويروح يودع فلوس بالبنك لأن 80% من النقد العراقي المتداول هو خارج المصارف العراقية والناس تضمة جوة الكاشية لو يم الحجية !

يقلل الانفاق العام والي هو يسبب هواية مشاكل بضخ العملة مثل مشاريع ما الها حاجة هسة ( نافورة , ملاعب ,  الخ..) و اذا اكو مشاريع او خدمات مهمة يحاول يلكة فد جهة استثمارية محترمة ومرموقة تجي تسوي هذا الشي وهو عليه بس يراقبها ويقوي قانون حماية المستهلك وقانون العمل والاستثمار . اكيد مشكلة الجيش والقوات الامنية كلش ماخذة حيز جبير ( فاكو حل هو التجنيد الالزامي لكن الكثير يعارضه ولهم اكيد مبررات ) وهنا لازم تكون اكو تحسين للعلاقات العراقية الخارجية وتكون وزارة الخارجية جيدة وذكية باستقطاب الدعم المجاني أو شبه المجاني وليس الديون و القروض .

بالنسبة للدولار فاكو حلول جميلة ايضا :

حتى ينزل سعر الدولار بالسوق العراقي لازم الدولار ميطلع خارج العراق فلازم الحكومة تسيطر وتنظم عمليات البيع ويكون فقط اهل الصرافة المجازين هم من الهم الحق بالبيع تنسق وية وزارة التجارة و جهاز السيطرة النوعية ان يقلل من الاستيراد العشوائي والي يتم عن خلالة تهريب الدولار لأن 57% من واردات النفط للاسف تطلع استيراد وتسيطر على عملية التحويلات وتراقبها  .

تفرض الحكومة ضريبة على المستورد حتى يكدر المنتج العراقي ينافس بالسوق ويكون ارخص من المستورد وبهذا تكدر الحكومة تجمع دولار اكثر بالسوق . الزوار و السياح نستقبل من عدهم الدولار وناحول نلكة اي طريقة نجمع بيها دولار ونحصرة داخل السوق العراقي من يصير هواية  اكو دولار راح ينزل سعر الدولار كدام الدينار العراقي .

هذه مقترحات قابلة للرفض وقابلة للقبول وهي مناسبة للوضع العراقي الراهن ( حسب نظري ) بعد ان تعدي الازمة اكيد راح تكون اكو اقتراحات اخرى مناسبة للوضع وللبيئة .

و أني متأكد أكو هواية خبراء عراقيين أقتصادين اكيد عدهم حلول وافكار افضل واجمل من هذه المقترحات بالنهاية نحن مجرد نقطة في بحر كبير وكل الاحترام والتقدير للبنك المركزي العراقي ويارب نشوفة يرجع احسن وافضل لأن هو معروف بتاريخ عريق .
 

 

الموضوع السابق المرجعية الدينية وتزييف المعايير ...... (الحلقة الرابعة)

قناتنا على التلغرام : https://t.me/kitabat