احزان الزچيّه

 عاشور هل وْهلّت احزان الزجيه
شهر المآسي البي جِرَت اعظم رزيّه

بالغاضريّه بالغاضريّه

..........................................

يشهر الضيم يا ريتك فلا هلّيت - عذابات وْ مآسي بْجيّتك لا جيت
جِبِت ويّاك كل الآم ال البيت - بْمُصاب ابن الزجيه الطاهره ردّيت
اَلَمنه چبير عالاطياب - عله الشبّان والاصحاب
الدمع همّال دم ينساب - وِگْلوبنه متوَجّره من هالرميّه

بالغاضريّه بالغاضريّه

.........

عَلَم كل بيت للشيعه رفع للثار – لبو اليمّه ابن طه النبي المختار
قسَم بالله ما ننسه المصاب الصار - نِذَرنه ارواحنا فدوه لبو الاحرار
اله شْمَنقدِّم مْقصرين – الامام اللي حفظ هالدين
وْعله نهجه نظل ماشين – وشْما بده مْن ارهاب من اهل الرديّه

بالغاضريّه بالغاضريّه

.........

تِلَگّينه الشهر عالعاده ونّ وْ نوح – مآتمنه نِصَبناها عله المذبوح
الثلِثتَ ايّام عالغبره بگه مطروح – اثر نحره جمر يسعر ابد ميروح
بْقصايدنه عهد ناعيه – فلا يوم اليِمر ناسيه
صَدِرنه عْله السبط ندميه – تنعه المجالس عالولي صبح وْ مسيّه

بالغاضريّه بالغاضريّه

.........

عله اخت حسين بت حيدر دَمِعنه دْموم – غريبه بْكربله ظلّت وحيدة گوم
نْوِلَت زينب بعد ما ذِبحَو المظلوم – الخيَم حرگوها والخدّر سِبَوها اليوم
همج ما رحمو الايتام – عصابه وْ تِدّعي الاسلام
لَعَنة الله عله الظلّام – اللي سِبَو بيت الوصي وْ حامي الحميّه

بالغاضريّه بالغاضريّه

.........

شْكبر لوعة حِزنّه عْله البطل عباس – الغَدِر لولاه ما ينصاب ابو النوماس
اله تشهد چفوفه شْسوّه بالانجاس – جراحاته شْكثر مصيوب حتى الراس
نْگِطَع چفّين راعي الجود – سهم بالعين دمها چْبود
نْضرَب عالهامه بالعامود – ما همّه كل صْواب بدر الهاشميّه

بالغاضريّه بالغاضريّه

.........

الجِرَه بْعشرة مُحرّم فاجعه وْمتهون – جرح ما يلتئِم ويّه الزمن مقرون
سببها الناصبي الطاغي ابن ميسون – الدعي وابن الدعي يْزيد البغي الملعون
جَرِح ينزف دِمه وْميطيب – ازل حزنه وابد ميغيب
فلا يمنعنه كل ترهيب – وشْگد محن شفنه وْ فتن وشْگِد اذيّه

بالغاضريّه بالغاضريّه
.

الموضوع السابق قنطرة الحب

قناتنا على التلغرام : https://t.me/kitabat