واحَدْ مِنْ بَلَدْنَا
عبد الله مطر

كأنه كان نايم في غيط

لا شاف سرير ولا نام في بيت 

ولا عمره كان في يوم لقيط

شايف غراب جوه الجراب

شايف طاووس

عمال ينقر في الفانوس

من غير لحاف

من غير غطا

بيدفي نفسه بالندى

شايف سحابة في السما

والدنيا لسه مغيمة

ننسى اللي فات

الجاى أحلى من السكات

كأنه نايم في الجراش

من غير فراش

نايم بيحلم بالدفا

متغطي بشوية نجوم

وسحابة زرقا في السما

نايم بيحلم بالرغيف

جواه ولو حتة قريش

م الجوع كفر

نفسه يدوق طعم الظَفَرْ

كأنه كان نايم في غار

عايش في يأس بدون قرار

حاسس بطعم من المرار

عمال يفكر ف المحال

خايف يقوم

ييجوا الفلول

ياخدوه بزفة ع الليمان

لأنه كان نايم جعان 

كأنه نايم في المطار

وعيونه مربوطة بمدار

وحياته في لحظة نضال

جوه ترانزيت الضلال

وناس مسافرة

وناس معافرة

وناس غلابة 

وشوشها صفرة

تاريخها مكتوب بالرصاص

وعلمها مرسوم بالمقاس

وعملها من تحت المداس

كأنه نايم في التابوت

خايف يموت

في بطن حوت

شايف حصاده بيتحرق

قدام عنيه

سايب حياته بتنتهي 

مابين ايديه

شايف الديابة بتلعنه

بألف صوت

شايف عيون الأخطبوط

وبرضه كان عايز

يموت

كأنه نايم ع الرصيف

شعور مُخيف

يعرف بإن الحق زيف

يحلم بقطمة من رغيف

من غير غموس

من غير وليف

يكون عفيف

ولا من ايدين واحد نضيف

ولا من جيوب واحد شريف

كأنه في نادي العُراه

معرفش صبحه من مِساه

تايه مابين وشه وقفاه

شايل على ضهره جبال

معرفشي يهرب م المحال

عايز يفوت بره الطريق

يروح يدور ع الصديق

يروح يشوف ام العيال

ويرد غيبته في قيل وقال

كأنه نايم ع السحاب

مربوط في غيمة من السراب

شايف جناح الحق راح

رايح يدور ع الصباح

عايز يدَوَرْ ع الضمير

خايف يِِقَرَبْ م المصير

عاوز يجيب دمه اللي ساح

والمستباح

في كل عرق وكل لون

فيها القانون

فوق الظنون

عَلَىَ المقاس

لناس وناس

فيه ناس تدوس

وناس تلوص

وناس تعيش من

 غير غموس

وناس بتاخد في الوريد

وناس يحطولها لبوس

الموضوع السابق صورتان من ألبوم الحرب

قناتنا على التلغرام : https://t.me/kitabat