رحنه انزور وي جدتنه خاجيه
عباس طريم

 رحنه انزور وي جدتنه خاجيه

ولن الناس وسط الدرب 

عاريه

 

شي شالت كتب.. شي تهتف: الاجيال

كلهه اتريد هذه اليوم

حريه

 

 

صاحت جدتي .. خاله يهل كتاب

كلولي شجاكم 

يالعريضيه

 

لا عدنه نفط لا كهربا لا غاز

وتجينه وتنكطع مرات

الميه

 

خبيزه اليوم اكلنه وي استكان الجاي

واتعشو افروخي ابفرد

زوريه

 

خلف الله على الحجيه مرت اعناد

ودت شوربه وتمن 

وركيه

 

حريه ولطمتو هاي عشر اسنين

يمه اشلون لو ردتو

اشتراكيه

 

اظن قرنين وسط الشارع اتصرخون

واطلابتكم اترد مثل ما

هيه

 

وكالت جدتي وروح امي جذابين

جدتكم تعرفوني 

محاميه 

 

 

اذا طك التفك ما تلكه نافخ نار

يمر ابطاري الحداث 

السياسيه

 

 

وذا شرطي يصيح اشعدهه هاي الناس

كل واحد يرد ويكول

معليه

 

المطالب.. ما تجي ابسد ساحة التحرير 

اتريد ارجال سمره وصدك

نشميه

 

ويطلعون طلعة ويهتفون ابصوت

ويسمونهه الطلعه 

الحضاريه

 

لا بيهه شتم لا قذف لا تكسير

للاصلاح تهدف مية

بالميه

 

ويكولون بويه يالسياسيين

راح اتموت هذا الصيف

خاجيه

 

جا حته الهوه اتكطعونه عن الناس

ارحمو البشر خاله 

يالافنديه

 

 

سودنتو الشعب خليتو راس ابراس

تتناطح .. وكلهم حاله

نفسيه

 

امحيسن جارنه من الحر وكع مرتين

والدكتور كال انلهبت 

الريه

 

الحرارة ابجسمه وصلت اكثر من الفين

وافيوزات مخه ايكول

مشويه

 

يخاله الحر كتلنه وبعد ساعة انموت

واظن مكتوبه موتتنه

جماعيه

 

ولكم كهربا حطونه , اوفرهود

روحو فرهدو وشيلو 

الماليه 

 

يهل البرلمان الما يراعي الناس

الله ايبربده ويفضح

بلاويه

 

 

 

ويكصر عمر كلمن يدك بالناس

ويشتت شمل كل 

الحراميه

 

ازرعو الطيب يمنحكم شعبكم طيب

صدكوني الحياة ايام 

مكضيه

 

 

رب الكون يمهل .. ما يعوف ارجال

تسرح .. والشعب مكسور 

ساريه

 

شعب ضاعت ضحكته وما سمعنه اليوم

بس ادموعه التهيل

ونواعيه

 

الموضوع السابق الكشف عن تفاصيل سرقة أدبية مخجلة

قناتنا على التلغرام : https://t.me/kitabat