ياليلة الحادي عشر..آه شعظم هالليله
عزیز الفیصلي

يا ليلة الحادي عشر ..آه شعظم هالليله
من جابوا الماي وغدت..ضجه بحريم العيله
ــــــــــــــــــــــــــــــــــــــ
ركضت رقيه عله السگا..نادت اقف يسگاي
لو تاخذ الماي وترد..لو للرمح تمشي وياي
هاليوم ثالث والدي..عطشان ما شارب الماي

اغرفله بجفوفي العذب..بلكن اروي غليله
يا ليلة الحادي عشر..آه شعظم هالليله
ــــــــــــــــــــــــــــــــــــــ
تغرف الماي ولو مشت..من جفوفها يتبده
وما بين ابوها والسگا...تجيب الدرب وترده
طفله وغصنها من العطش..ذبﻻن مثل الورده

ومن وصلت لذاك الرمح..گلة عليها الحيله
يا ليلة الحادي عشر..آه شعظم هالليله
ــــــــــــــــــــــــــــــــــــــ
ما وصلت لربع الرمح...كل ما تمد ايديها
بالخيزرانه تعلگت...تحني الرمح ما بيها
حاولت يا ما حاولت...رفعت كعب رجليها

والراس يتمايل غدى...يبجيلها وتبجيله
ياليلة الحادي عشر...آه شعظم هالليله
ــــــــــــــــــــــــــــــــــــــ
يبچي عله بجاها الرمح...ظل ينحني ويتطوى
من شافها هدهه العنه...گامت تگوم وتهوى
حتى بعدوها توسلت...بلجن بگايا مروه

ينزل الراس من الرمح...تشربه العذب ويشيله
ياليلة الحادي عشر..آه شعظم هالليله
ــــــــــــــــــــــــــــــــــــــ
گاموا يضحكون العدا...شوف الدهر دوﻻبه
حسبالهم طفلة عمر...جابوا لها لعابه
وهي عله بوها مفرفره...تبجي وتحن يا بابه

ضحك الشماته ظل يگص..بضلوع صدر صليله
ياليلة الحادي عشر..آه شعظم هالليله
ــــــــــــــــــــــــــــــــــــــ
وكعت على راگي الرمح...وتريد تسهر يمه
لن من ظلام المعركه...تسمع نوايح حرمه
يحبيبه آنه عمتك...ردي عليه يا عمه

ركضت رقيه عله الندا...ومن المصيبه نحيله
ياليلة الحادي عشر ...آه شعظم هالليله

الشاعر

الموضوع السابق حوار صدى الروضتين مع الدكتور محمد حسين علي الصغير رحمه الله

قناتنا على التلغرام : https://t.me/kitabat