خراريف وطن مجروح - الجزء الاول
احمد عرار

المقالات لا تُعبر عن وجهة نظر الموقع، وإنما تعبر عن رأي الكاتب.

باللغة العربية الفصحى استيقظ وركز واصحي

هاي المرة معلش سمحونا بدنا نحكي بالعمية وبالمشرمح لانه بصراحة مش عارفين انعبر عن هاي الخراريف اللي بتحصل في بلادنا 

انتو عارفين طبعا انه أحنا في ظل ذكرى الإعلان العالمي لحقوق الإنسان وعارفين طبعا انه حقوق الإنسان كثيرة وعارفين كمان انه أحنا مش محصلين حتى حقوق الحيوانات.

 

أول خريفة بدي احكيها الكم خريفة الكهرباء في غزة

 من قبل كم يوم والكهرباء قاطعة عن آلاف الأسر الفلسطينية بغزة بأمر من شركة الكهرباء ورعاية وحماية الشرطة الفلسطينية. لأنه قال هدول الناس اللي قطعوا عنهم كوابل الكهرباء ما بيدفعوش أما الموظفين فبيخصموا عليهم. والله أشي بضحك طيب يا عمي وظفوهم عشان يدفعوا. علي الطلاق لو وظفتموهم ليدفعوا عن حالهم ويدفعوا كمان عن وزير الطاقة مع انه بسحب كثير عشان المكيف.

أنا مش عارف وين السيد إسماعيل هنية رئيس الوزراء عن هدول الناس اللي بلا كهرباء ولا مية، لأنه انته عارفين انه المية بتحتاج مواتير والمواتير بتحتاج كهرباء عشان هيك صارت الناس بتروح تعبي مية من الجوامع اللي بعضها أغلق أبوابه أمام الناس. قبل يومين كانت الانطلاقة وشفت شوارع غزة كلها خضراء يعني الرايات كانت بالملايين وطبعا كل راية بتكلف اقل شيء 5 شيكل يعني هاي الرايات كانت قادرة تحفظ كرامة الناس وتسد عنهم الكهرباء.

ما علينا...

 

نحكيلكم الخرفية الثانية. مخازن وزارة الصحة في غزة فاضية من الأدوية والناس المرضى هتموت على سرايرها من الوجع والألم وطبعا فكركم ليش يا ترى؟ من الاحتلال طبعا لا، عشان السفالة وقلة الحياة هي السبب.  هذا يا سيدي رام الله ما بدها تبعث أدوية لغزة قال لأنه حماس غيرت المسئول عن المستودعات والمخازن وحماس مصرة وما بدها ترجع الموظف القديم.  يعني الناس تموت عشان خاطر حماس وفتح. الله اكبر يا أخي

 

نخرفكم كمان خريفة.  خريفة جوازات السفر

هذا يا سيدي بقلك بتوع حقوق الإنسان راحو لوزير الداخلية برام الله الضميري وقالوا اله يا زلمة ليش بتمنع جوازات السفر عن الفلسطينيين فرد عليهم الوزير وقلهم "معقول" يا حرام يعني الوزير بريء ومش عارف أشي بس المشكلة انه الوزير مش فاهمك المثل الي بيقول لو كنت تعلم فتلك مصيبة وان كنت لا تعلم فتلك مصيبة أعظم.

 

في كمان خريفة كثير بتخوف زي خريفة أمنا الغولة.

بقلك يا سيدي في كبشة أطفال أولاد مدارس قتلوا برصاص المقاومة، لأنه هدول عاملين مراكز تدريب بجانب المدارس، وما حدش عارف ليش يمكن عشان ما في وسع بغزة ويمكن لأنه ما عندهم جرس فبدهم يستفيدوا من جرس المدرسة في التدريبات.

 

في كمان خريفة حزينة وعن جد بتخجل.

هذا يا سيدي بقلك الأحزاب والفصائل الفلسطينية ألغت كل الفعاليات الوطنية من أجندتها وصارت بس تعتمد  الفعاليات الحزبية. اشرحلكم كيف. في يوم الأسير الأحزاب كلها كانت 1000 مشارك وفي يوم الأرض كانوا 100 نفر وفي يوم التضامن العالمي كانوا 100 وفي يوم الشهيد ما حدش عمل ندوة. باين انه راحت عليك ياشهيد أجرك على الله. الأحزاب ايش بتعمل بتبعث خمس أشخاص معهم الرايات الحزبية عشان يقولوا هيهم موجدين يعني شغل لفتك ما لفتك. ولو كانت الانطلاقة بتاعتهم بتلاقيهم بالآلاف. حسبي الله ونعم الوكيل.

 

اسمعوا هاي الخريفة.

طبعا انتو عارفين انه الكاتب هو ضمير الأمة وهو صوت الشعب وهو صوت الحقيقة، بس عند رئيسنا أبو مازن الموضوع اله شكل ثاني. اسمع يا سيدي بقلك اتحاد الكتاب في غزة مغلق من عدة شهور قال لأنه عليهم ديون إيجار مكاتب وغيره. لأنه ياسر عبد ربه مسئول المالية في منظمة التحرير ما بدو يدفع الهم. المهم راح مراد السوداني رئيس اتحاد الكتاب لابو مازن سيادة الرئيس طبعا وحلقله عالناشف  وقله" ما بدنا لاكتاب ولا بطيخ" يعني الكاتب عند أبو مازن شقحة بطيخ. آه يا زمان.

 هحكيلكم خراريف ثانية في المرة الجاية هذا طبعا إذا ما صحتلناش رصاصة طايشة والا بتنا في شي مركز للمعتقلين...

ومش عارف ايش بدنا نقول غير اللي بتقولوا كل الناس "ربنا يوليها الصالح"

الموضوع السابق الازمة السياسية واحترام قواعد اللعبة

قناتنا على التلغرام : https://t.me/kitabat