• القسم الرئيسي : ثقافات .
• القسم الفرعي : ثقافات .
• الموضوع : جريو امن السطح شمروه شمر خيه كضوه قابضا بايك كمرليه .
• الكاتب : عباس طريم .
جريو امن السطح شمروه شمر خيه كضوه قابضا بايك كمرليه
|
|
خيه ايكول من الياخه كضوني
وكالو ها ولك , شتسوي يالدوني
مثل خنك الدجاج الربع خنكوني
كمت ارفس واصيح ادخيل خاجيه
+ + +
ايكول اتناوشوني الربع بالطكات
وما ادري امنين اشتغلت الدفرات
اجانه عود يركض للسطح , جفات
فرجت كلت , شو بيس صدك بيه
+ + +
ايكول اجريو : وسط القفص شافوني
وكالو جاي كهوه , انصبلك اعيوني
كلتلهم تهت عن اهلي دلوني
وكالولي انشمرك غير ؟ عاديه
+ + +
كالولي اعترف جم طيره بايكنه؟
نعرفك زين عشر اسنين جار انه
كتلتلهم عبالي ابيتكم حنه
واجيت ادفع الواجب بيه مابيه
+ + +
اجتني امي وصاحت مستحيل ايبوك
شوداه للسطح , هذه اختصاصه السوك
كالو باك طيره , اوعبه كله اذروك
شيسوي ابسطحنه ايبيع شاميه؟
+ + +
امي اتصيح يمه الخاطري هدوه
هل وحيد ييمه وعدي, لا تولوه
اعوضكم الطيره ابعشره بس حلوه
وافصلكم ابتي الحلوه بنيه
+ + +
كالو لا, فصلنه امن السطح نرميه
وعبره لليبوك اطيورنه انخليه
لتلحين حجيه ابد , خليه
واحسبيه بالحبس ويه الفراريه .
+ + +
خيه تناوشوه من كل كتر واحد
وما لحك يخيه اجريو , يتشاهد
رموه , وظل شهر من الكتل فاقد
ايصيح اتفصخت تفصيخ رجليه
+ + +
وداني يخيه وصحت كل الناس
وكال ارد احلف , وشد راية العباس
ما ابوكن بعد , لو ابقه عمري افلاس
وروح اشغاتي عمي , وعمتي صينيه
+ + +
خيه اطيوره كلهه اطاهه للوادم
وصارت بالسطح دفرات ومرادم
شياخذ للكبر وياه , البنادم
اجريو ايسولف : الربعه الحراميه؟
+ + +
خيه جريو تاب اشتغل بنجرجيي
وكال : احرك ابيه الكال مطيرجي
من يوم الرموني امن السطح , فجي
مكسور , وصرت سالوفه مرويه
|
|
|
• المصدر : http://www.kitabat.info/subject.php?id=90547
• تاريخ إضافة الموضوع : 2017 / 03 / 09
• تاريخ الطباعة : 2025 / 03 / 14