|
كلهه صاحت : يا حسافه
شلون مثلك ها يطيح !!
يا حسافه على النذاله
اتزيد من ذبح الذبيح !!
اشلون تتنكر جراحك
للجراح و تستريح ؟!
××
يا حسافه على الخبز
تآكل ويانه و ننغدر
تصلي كــدامي وتكابر
وانت شيطان وعبر !!
كفرتني بكل صلاه
وكفرتني بها العمر
***
يا حسافه اشلون دوهني الوكت
ما وكف حتى القريب
اشلون من هذا البخت ؟!
رحت اسولف للجدار
اشلون تآخذني وتعت
خنجر الغدر بضلوعي
وانت تحلالك دموعي
يا حسافه
وين صحوة ها الضمير ؟
المات من يوم العشت !!
**
يا حسافه اشلون باكتني السوالف
وآني مرهف مثل شمعه
تضوي للماجان عارف
يا حسافه
اشلون ضميتك بليل وانت خايف
شلون غطيتك بروحي
اشلون طشيتك عواطف !!؟
انت عار
وتستحي منه الشفايف
انت خايف
كون غدرك من كلامي اليوم راجف
انت حتى الرب ذبحته
انت حتى الله خسرته
بيوم ملكاه العظيم
تشهد اعيونك عليك
وخنجر الغدر بايديك
**
اليخونك مو سبع لكن جبان
اليخونك باع ربه بهاالزمان
اليخونك خان جلده
اليخونك خسه عنده
اليخون الزاد ما عنده ضمير
اشكد حقير اللي اكل خبزك وخانك
اشكد نذل واشكد حقير !
يا حسافه
اسنين عمري الماحوت غير الكلاب
طوقت روحي بوردها
وما غدر غير الصحاب !!
يا حسافه
اعله الطريق اللي مشيته ويا حسافه اعله المكان !
اشلون ما شافت اعيوني الغدر بعيون الجبان
(انت معجون بخيانه
انت ما تسوه زبانه )
يلذبحت اولادك بايدك فخر !
تسكر بدمع اليتامه ...تصيح هذا من القدر !!
وك .. يا قدر وانت السبحت بدم شهيد !!
يلذبحت الروح من حبل الوريد
يا شمر تكتل احسين بكل سنه
يا عزا التطبير يذبحني انه
يا مصايب شيعه ما تخلص بعد
يا يزيد العار خاين للابد
كلي شنهو الصار شنهو اللي جره
كلشي عندك من نذاله
يا سفاله
اتنكست بها السفاله
جنت اشوفك نبع للعطشان ماي
صرت اشوفك خنجر ويمشي وراي
راح عمري وياك طيف ومر سحاب
يا حسافه اعله السنين الما بقه منها سراب
يا حسافه بديرتي مات الشرف
من اجيتك يا زماني كلبي ما بطل نزف
انزف احروف ومعاني والعدو بيها اعترف !!
***
اشما اشوفك آكل بروحي اكل
ضيعت احلى الاماني ابين جفين النذل
يا حرام المالبس يوم الحلال
انت خاين واليخون الزاد محكوم بزوال
وآنه نجمة ليل
محكومه بعشك
ينتظر بوسة ضوه منها الهلال ..... ويا حسافه |
