روح... هاجر
عوف ارضك...
شلك بارض المقابر..
شلك بموطن صبح مشتل خناجر..
روح هاجر..
تلگه باوربا ألأمان.. وكلشي حاضر..
روح هاجر..
بس اكلك مو بعد سنتين ترجع
فوگ دبابه وتكلي.. مضظهد.. لاجئ سياسي
تگلي ثائر..
هيه مره.. وبينه صارت
مره سووهه گبل ولد القنادر..
باعو بديرة غرب حته الضماير..
روح هاجر
احنه هم ماشي نهاجر
بس سفرنه مو بعيد.. هناك يم حلگ السواتر
 
احنه ندفه من نلف اعله الصدر اربع شواجر...
روح هاجر..
جرحك انته الكهرباء
ماي مالح
خدمات
شارع يسر النواظر..
وانه جرحي هواي اكبر
مايوصفنه المشاعر..
انه جرحي بكبر يوم الاربعين
وبيه حرارة يوم عاشر..
انه جرحي ماتضمده الغانيات
ولا يطيبنه العواهر....
انه جرحي ايطيب.. لوخادم زغير
يصيح باذني استريح اهنا يزاير