الجمعة 24 مايو 2013    السادسة مساء بميدان طلعت حرب بالقاهرة

شهد شعب مصر فى الاونه الاخيره ان ما يمتلكه من موارد يتم سرقته على يد النظام الحاكم عن طريق منح دول اجنبيه وشركات متعدده الجنسيات عقود امتياز بمدد زمنيه طويله.

الامتلاك بحق الامتياز يمثل احتلال جديد لمصر بسلاح الاستثمار.لذلك وجب علينا بدء حمله مش بنبيع تراب بلدنا لمحتل صهيونى متخفى فى هيئه مستثمر .

اولى قضايا الحمله:

مشروع تنميه اقليم قناه السويس:

يعني ايه قانون تنمية اقليم قناة السويس الاخوان عايزين يعملوه ؟

1- يعني رئيس الجمهورية يعين 15 فرد غير معروف هم مين ولا هيختارهم ازاي وهو بس له الحق يعزلهم او يجدد لهم

2- يعني مجلس ادارة للإقليم بديل عن الحكومة و الوزارات كلها ماعدا الدفاع و الداخلية و العدل 

3- يعني يفصل شرق التفريعة و خليج السويس و السخنه و وادي تكنولوجيا الاسماعيلية و سيناء عن باقي مصر

4- يعني منطقة ليها نظام تعليم و ادارة و قانون عمل و تأمينات اجتماعية و السجلات التجارية و النظام الضريبي غير المعمول به في باقي الجمهورية

لسه عايز تعرف يعني ايه قانون تنمية اقليم قناة السويس ؟

5- يعني مجلس إدارة هيئة الاقليم متلك اراضي الدولة ويخصصها للمستثمرين و يأجرها و يبيعها و ينتزع ملكية الاراضي من الشعب بدون اي رقابة لا من الحكومة ولا مجلس النواب ولا الشورى

6- يعني جزء من ميزانية الدولة يدخل في رأس مال الاقليم و برضو الاقليم يبقى له موازنه منفصله 

7- يعني مجلس ادارة الاقليم هو اللي يقرر ايه المشاريع اللي يعملها و ايه يرفضها

8- يعني مجلس النواب يراقب التقارير عن نشاط الهيئة و ميزانيتها و حسابها الختامي بس غير كده ملوش الحق في المراقبه

9- يعني فساد و عمولات و ادارة و سلطه بدون حسيب ولا رقيب

10- يعني تسهيلات للمستثمرين بإعفائهم من الضرائب و الرسوم و الجمارك

11- يعني حضرتك تشتغل في الاقليم ومفيش قانون بيقول مرتبك كام ولا عدد ساعات العمل ولا ايه حقوقك و واجباتك و ده كله بيحدده 15 فرد معينهم الرئيس

12- يعني يتعمل مطارات و مواني و يديرها مجلس ادارة هيئة الاقليم 

13- يعني مش ناقص غير ان اللي عايش بره الاقليم ياخد تأشيرة دخول لو يحب يزور اهله اللي عايشين في الاقليم ده

14- يعني بلدك بتتباع و تتقسم و حضرتك قاعد تتفرج

كيف يمكن لقانون بهذه الخطورة ان تقوم به حكومه ومجلس انتهت فترة وجودهما الشرعى طبقا للماده 229 من دستورهم؟

هل يمكن عزل كل قوى واحزاب الشعب المصرى عن المشاركه فى هذا القانون لتتولى جماعه الاخوان وحدها الحق فى اصداره؟