تمنيتچ ييمه ابگربي هاليوم
اَلج باسمچ يروحي او گلبي مالوم

شفت بعدچ مآسي او لوعه والام
وْعشت اصعب ليالي او حالي معدوم

يوجه الخير يا نور مْن الانوار
بدر وجهچ ييمه ايزيل الغموم

اَنه ابلياچ حاير يا ضوه العين
الي چنتي السند ما اعرف اهموم

يروحي او كل حياتي او اغله الاحباب
ازل حزني عليچ او باقي للدوم

ولا لحظه نسيتچ ذكرچ او ياي
رسم وجهچ اشوفه ابيقظه والنوم

وْصدَه الْصوتچ اسمعه مْن ادعي بالليل
بصلاتك يبني لا تنساني والصوم

يهل دمعي او اناشد رب الِعْباد
بسم طه ارتجيت او دمعي مدموم

دعائي يالعزيز او انت رجواي
گبر امي يضَوّي مثل الِنْجوم

وْعليك اقسم الهي ابعلي مولاي
ابو الحسنين درّ او بحر الِعْلوم

تِخَلّيها ابجنانك ويّه الاطهار
رجيتك يالهي او گلبي مهضوم