ساقي العطاشه بْكربله يابوالوفه يا بوالوفه

شبل الوصي حامي الحمه يابوالوفه يا بوالوفه

 

........................

 

عباس ابو الغيره الوفي صف البطوله اوْيالكرم

طف كربله يشهد اله جيش الظلم منه انهزم

تحده المنيه والخطر ماهمه رمح اوْ لا سهم

لْحده فلا واحد وصل عالمشرعه واگف علم

 

راعي الوفه مي ماشرب يابوالوفه يا بوالوفه

صوت العطاشه ايْألمه يابوالوفه يا بوالوفه

 

........................

 

حيدر علي بالمعركه شامخ بطل مثل الجبل

ليث الهواشم وابْفخر ذل الاعادي ابن الفحل

بالمعركه چن عاصفه بجيش الدعي ضاع الامل

خيل وْسيوف اتْجمعت تگصد ابن خير العمل

 

غدرو يمينه اوْيسرته يابوالوفه يا بوالوفه

زنده العلم ما سلمه يابوالوفه يا بوالوفه

 

........................

 

بعزمه يلاويها الزلم حامل جِرِبته اعْله الظهر

سهام الغدر من صابته گلبه على الجربه انعصر

نيته يِوَصِلها الخيم انصابت جربته وانغدر

اسْهام المنيه الحاقده النزلت عليه مثل المطر

 

صابتله عينه اوْجربته يابوالوفه يا بوالوفه

الزمره اللعينه الظالمه يابوالوفه يا بوالوفه

 

........................

 

كل الجِراحات المضت حامل اثرها ابْقوته

موبس چفوفه مگطعه اوْ دمه النزف من هامته

كل هالجروح البالجسم صابر اشم ما همته

ناده الامامه او سيده نظرة وداع الشوفته

 

حسين انتفض لمن سمع يابوالوفه يا بوالوفه

صوت الاخيه من السمه يابوالوفه يا بوالوفه

 

........................

 

لمن وصل يمه وگعد يسمع كلام ايردده

رايد لِمامه ايْودعه بحظنه الحسين اتوسده

صار الكلام واليدمع بين الچفيل او قائده

يمسح دموعه ايْكلمه ظهري انكسرحزني ابتده

 

مْودعك يخويه ويالنبي يابوالوفه يا بوالوفه

لحظة وداع او حاسمه يابوالوفه يا بوالوفه

........................

 

نعزي العقيله ام الخدر وام البنين الطاهره

بليث الليوث ابن الاسد روح الزچيه اوْ حيدره

سطر ملاحم بالحرب مهيوب سبع الگنطره

ضحَه الْامامه اوْمذهبه الاخر حياته ايناصِره

 

باب الحوايج مفخره يابوالوفه يا بوالوفه

ابن الرضيه العالمه يابوالوفه يا بوالوفه

 

 

..................................................

..................................................

 

خادم اهل البيت ع

الشاعر

سعيد الفتلاوي الطويرجاوي