الحياة   ايقسموهه   لعدة   افصول 

    ومراحل .. زينه  مرة ,ومره

     شينه

       مرات  الفرح  بفصولهه   ايطول

    ومرات   الحزن   تطول 

      اسنينه

    هذي  القاعدة  الكل بيهه  مشمول

    ونبقه  ابكل  ضروف, الهه

     رهينه

     

    هاي الدنيه .. دوم الفلسفة اتكول

    الحيا  مرات   مرة  , ومره 

     زينه

     

    تاريخ   ودرسنه  البيه  المعقول

    وجربناه    من    يوم  

       الوعينه

     

    يكول العلم: بعد الزرع  محصول 

     وحصاده اللي  انزرعه ..ايرد 

     علينه

     

    اليزرع  خير.. يحصد خير وينول   

    اليزرع   شر.. شر تحصد 

     يمينه

 

    حياة  وهيجي بيهه ا لقاعده اتكول

    بس   كل    القواعد    

      خالفينه

 

    زرعنه  الخير, صاراجبال وتلول

     ومنه   ابيوت     للعالم   

      بنينه

 

     وتاليهه عكس ما  جان    مامول  

    وعكس   ما   جان  متوقع

      لكينه

     

     حياة  وبيهه نركض مثل الخيول

    وغير  الفشل  صدك  ما 

      حوينه

     

     مستقبلنه  دون   الناس  مجهول

    واللي  ايطيح   بس  الله  

      اليعينه

 

    تطشرنه  ابمدن , وجبال  وسهول

    ويا للاسف محد حاس 

      بينه

 

    التعب والضيم بينه يجول ويصول

    وبنار الغرب كلنه

     اشتوينه

 

    المو تعبان  بينه اتشوفه معلول

    بغربه  وتدري بس ربه 

    اليعينه

 

    شربنه  من البلاد انهار وسيول

    شربنه  العمر  كله وما 

     روينه

 

    الغريب  بكل   بلاد الله  مذلول

    مو ارضه وصعب  يرفع

     جبينه

     

    واظن هذا المثل ساري ومكيول

    يظل   الكلب  للموطن   

     رهينه

 

 

    الهي الضائقة العظمى متى اتزول

    ومتى اهلال الرجوع ايهل

     علينه

 

     

    وطنه وحكنه من نعتب , من انكول

    تعبنه يا وطنه اوفاض

    بينه

 

    اريد اشكي الضياع , وكل شي اليجول

    ابراسى من الهموم

    الشايلينه

 

    واحلفه  ابروح  ال البيت  الفحول

    يجي الغربتنه يمشي  

    ويعتنينه

 

    واكله    يا وطنه   غير   معقول

    نشكيلك وما تسمع

    حجينه

     

    اكلتو احكوكنه  بالحجي المعسول

    ونجيكم  مثل   فقره   .. انمد 

      ادينه

 

    اسمنه امن  الحقوق.. اليوم مشيول

    واللي انعاتبه .. ايجاوب 

    نسينه

 

    ويكول  ابسجلنه   الطلع .. مكتول

    وبين العايش وميت

    بقينه

 

    بس اليعرف  المسؤول, مشمول

    والماله معارف

    تاركينه

 

    اهل الواسطات اتصول واتجول

    والمسكين.. بس ينظر

    ابعينه

 

    اريد اوكف واصرخ فوك الطلول

    بلجي الوطن يتعنه 

    ويجينه

 

 

    واكله  الامل  يا مولاي  مقفول

    واخوتنه  الطريق 

    امسددينه

 

    اللحم  بس الهم , وخلونه الفول

    وكالو للنشامه 

    ضامينه

 

    ومن  جينه  لكينه  الاكل مشيول 

    وحته الفول  الكشر  ما

     لكينه

 

    ومن شفنه  الزرع والثمر ماكول

    عليمن جينه .. ولياهي 

    نسينه

 

    حاولنه  نلاكي  انصاف الحلول

    وتاليهه  مثل  ما رحنه

    اجينه

 

     

    منين  انجيب عاقل  مثل  بهلول 

    يصفيهه      ويخلي   الحل  

     بدينه

     

     

     اتسمعونه  كلام  اهواي  معسول

    يا  محله    صفاته    ومحله 

       لينه

     

     

    ويومية    يجي   مسؤول  ويكول

    والعباس خططنه   

      وبدينه

 

 

 

      بس عالمغترب  ضيعتو  الحلول

    شوفو    الناس    تعبانه  

      وحزينه

     

     

     السكر والضغط  صاعد على طول 

    والكرستول     والنفسيه    

          بينه

     

     واوجاع   الظهر والدوخه  متزول

    بس   لحم  وعظم     ولكم  

     صفينه 

     

 

     يمته انشوف اخو ايصفيهه وانكول

    اجانه  النشمي   واللي  ايحن 

     علينه

 

 

    ويوزع   العدل   بالعرض  والطول

    والغايب يذكره ..  ايكول

    وينه