الحياة   ايقسموهه   لعدة   افصول 

    ومراحل .. زينه  مرة ,ومره

     شينه

     

    مرات  الفرح  بفصولهه   ايطول

    ومرات   الحزن   تطول 

      اسنينه

     

    هذي  القاعدة  الكل بيهه  مشمول

    ونبقه  ابكل  ضروف, الهه

     رهينه

     

    هيج   الدنيه  هيج  الفلسفة  اتكول

    الحيا  مرات   مرة  , ومره 

     زينه

     

     

     يجي  مدة  الحزن للناس  ويزول

    وميظل   اثر   لدموعه   

     ا ونينه

     

    تاريخ   ودرسنه    البيه   معقول

    وجربناه    من    يوم  

       الوعينه

     

    يكول العلم بعد الزرع  محصول 

     واللي انزرعه  هوه اللي 

     يجينه

     

    اليزرع  خير يحصد خير وينول   

    اليزرع   شر , شر تحصد 

     يمينه

 

    حياة  وهيجي بيهه ا لقاعده اتكول

    بس   كل    القواعد    

      خالفينه

 

    زرعنه  الخير صاراجبال وتلول

     ومنه   ابيوت     للعالم   

      بنينه

 

     وتاليهة عكس ما  جان    مامول  

    وعكس   ما   جان  متوقع

      لكينه

     

     حياة  وبيهه نركض مثل الخيول

    وغير  الفشل  صدك  ما 

      حوينه

     

     مستقبلنه  دون   الناس  مجهول

    واللي  ايطيح   بس  الله  

      اليعينه

 

    تطشرنه  ابمدن  وجبال  وسهول

    وما  ندري   منو المسؤول 

      بينه

 

     واحدنه    يسير   وهوه   مكتول

    وفوك    الضيم   ربان 

       السفينه

 

    تركهه وراح يسرح  فوك التلول

    وكله    اتصيح    هالسفان

      وينه

     

    التعب والضيم بينه يجول ويصول

    وبنار الغرب كلنه

     اشتوينه

 

    المو تعبان  بينه اتشوفه معلول

    بغربه  وتدري بس ربه 

    اليعينه

 

    شربنه  من البلاد انهار وسيول

    شربنه  العمر  كله وما 

     روينه

 

    الغريب  بكل   بلاد الله  مذلول

    مو ارضه وصعب  يرفع

     جبينه

     

    واظن هذا المثل ساري ومكيول

    يظل   الكلب  للموطن   

     رهينه

 

    اهلنه ابديرة ,واحنه..وساحل يحول 

    ولو  يومين   نوصل , جا 

     مشينه

 

    الهي الضائقة العظمى متى اتزول

    ومتى اهلال الرجوع ايهل

     علينه

     

    تعبنه وما لكينه  انصاف الحلول

    ولكم  يا  عبا دالله 

     خوينه

     

     

    شلنه اعله الظهورانواع  الحمول

 

    بس  ..كافي ا لتعب  مو بس 

    علينه

     

    اكلتو احكوكنه  بالحجي  المعسول

     

    ونجيكم  مثل   فقره    انمد 

      ادينه

 

    اسمنه امن  الحقوق اليوم مشيول

    واللي انعاتبه .. ايجاوب 

    نسينه

 

    بس اليعرف  المسؤول مشمول

    والماله معارف

    تاركينه

 

    اهل الواسطات اتصول واتجول

    والمسكين.. بس ينظر

    ابعينه

 

    الهي  الامل بابه حيل  مقفول

    بكل طاقاتنه  النملك

    سعينه

 

     

    منين   انجيب   عاقل  مثل  بهلول 

    يصفيهه      ويخلي   الحل  

     بدينه

     

     

     اتسمعونه  كلام  اهواي    معسول

 

    يا  محله    صفاته    ومحله 

       لينه

     

     

    ويطلع   ذاك  يحجي  يهدي  ويكول

     

    هانت     يا  شعب  ما ظل  

      نوينه

 

 

 

      بس عالمغترب  ضيعتو   الحلول

 

    شوفو    الناس    تعبانه  

      وحزينه

     

     

     السكر والضغط  صاعد على طول 

 

    والكرستول     والنفسيه    

          بينه

     

     واوجاع   الظهر والدوخه  متزول

 

    بس   لحم  وعظم     ولكم  

     صفينه 

     

     يمته  انشوف  اخو ايصفيهه وانكول

     

    اجانه  النشمي   واللي  ايحن 

 

     علينه

 

    ويوزع  العدل  بالعرض والطول

    والغايب يذكره ايكول

    وينه