انْتي المَرا اللي بْشوفْها

بْكُل الصُّور

بْهَبِّ الهَوا بْقَطْر النَّدى

بْموج البَحَر

انْتي الصُّبِح وِشْروقو

حبَّات المطر

لِمْنَفنِفي هيك بْهَداوي

عَالشَّجَر..،

انْتي اللي جُوَّا القَلْب

وَرْدات القمر

قَنْديل مَحَبِّه ضاوْيي

ليل السَّهَر

انْتي المَرا اللي بْشوفْها

بْكُل الصُّوَر

***

انْتي المَرا اللي بْدونْها

ما في رَحيق

للياسَمين

ْوللشَّمِس ما في بَريق

بين زُنودي تِهْجَعي

وْلمَّا أفيق

ألْقى بِعُبِّي مْخَبْيي

زاد الطَّريق

بوسات تَتْحَمَّل مَشَقَّات

السَّفر

انْتي المَرا اللي بْشوفْها

بْكل الصُّور

***

دايْر عَليكي في زَقاقات

كْوِكات *

في البروِه * في مَعْلول *

في كُل السَّاحات

عا عين مَيِّ الكابْري *

في لَمِّة الحلوات

أرْكُّض تَ أحْمِل جَرْتِك

مَ الْقى أثَر

انْتي المَرا اللي بْشوفْها

بْكُل الصُّور

***

تِحْمِل سلامِك كُل مسا

طْيور السَّما

وْهي راجْعَه لَعْشوشْها

تِوْمي وَما

وِاليوم مِنِّك طير قُدَّامي

رَمى

مُفتاح بيتِك هيك عَ الدَّرْب انْحَفَر

انْتي المَرا اللي بْشوفْها

بْكل الصُّور

---------------------------------------

*كويكات والبروة ومعلول والكابري اسماء

لقرى مهجرة في الجليل الغربيالناصرة