( بمناسبة ولادة الأمام عليّ عليه السلام )

                                                                   

    ياللي ردت مني اجواب      هاذا علي داحي الباب

                             *****

                       

  علي  يعسوب  الابرار         ما أجه  مثله  ولا صار

   قسيم  الجّنه   والنار          وعد ربه عالي الجناب

  علي    للدوله عنوان           بالعدل  حكمه  ميزان

  الناس   كلهم  اخوان           رغم اختلاف الانساب                                                            

  هذا علي عالي الشان          صوره براها  الرحمن  

  أوّل   زلمها    أيمان           ومكّه    تعبد  انصاب                                  

  علي  جفّه  مواعين            تدوّر ..   عالمساكين 

    بكلبه يلفّي الطيبين           شكر ما يبغي وثواب   

   هذا علي بو الطيبات          عفّ النفس والغايات

   الشدايد عدّه  هينات          بحكمته العتمه تنجاب 

   علي ساس الولايات         ليجي من عدها والفات

   تسامه  بعفّة  الذات          عرب تشهدله واجناب

 

 هذا علي ذهب صاف        فوك الوصف والاوصاف                

 ابو العدل  والانصاف       و ابكنهه   حارت  الباب

 هذا علي ابو النوماس      خير العرب .. والاجناس

 بعد النبي الهدى الناس     (بلامّيم) ...  ذاك الكتاب 

علي  اصحابه  اجاويد       أهل  دين .. .. ومزاهيد

 الوفه عدهم  اله يزيد       هني لكل ذيج الاصحاب

 

 هذا علي باب  اعلوم        للناس ..  قدره  معلوم

 دامت  محبته  وتدوم        بين الحشا.. والاصلاب

 

  يا سائلي  لا  تحتار         علي ابن عمّ المختار

  أبو الايمّه  الاطهار         وجدّ الامام اللي غاب

 

 هذا علي بو الحسنين     راعي الشريعه و الدين

 تشهد   إله   ميادين        منه  المغاوير  اتهاب

 هذا علي نور العين         ابحبه احنه  مسيسين

 يا سايل احنه محبين     وفايض عشكنه بوتراب

حبنه لعلي  ما ينقاس      كد الهوى ... والانفاس       

وشكثر بالارض ناس      وكد السمه ... والتراب 

هذا علي ضوه الكون       ولينه  كان .. ويكون

اليبغضونه   يهلكون       بالدنيه  والهم احساب

 

هذا علي الكصد ليه       يضيفه... ويحتفي  بيه 

لزوّاره يفرش ايديه      واللي  يزوره  ما خاب

 علي ..  للعكده  حلّال        وأمل  للما له  آمال

 شفه ...للعلّته اعضال        ومحب للفاكد احباب 

علي اسمه يرطّب الريج    وعلي مفتاح كل ضيج

باذن الله  منه   تفريج      ويغدن الضاكن ارحاب                                           

                                                                                    

هذا علي  نار  ونور        بالسمه    كبّته  اتدور

يا سايل جرّب وزور       بالحضره تلكه الجواب